Қазақстанда 31 тамызға дейін қант экспортына тыйым салынды
6 мамырда вице-премьер Серік Жұманғариннің төрағалығымен отырыста қант қызылшасының жаңа өнімі жиналғанға дейін ішкі нарықты қантпен қамтамасыз ету мәселелері қаралды. Осылайша алдағы жазғы маусымда қазақстандықтардың қантқа деген сұранысын толық қамтамасыз етуге мүмкіндік береді. Бұл туралы Stan.kz ақпарат агенттігі хабарлайды.
Фото: mir24.tv
Үкімет баспасөзінің мәліметіне сүйенсек, қазiргi уақытта қоймалардағы қант қорының және Қазақстанға импорт көлемiнiң теңгерiмi шамамен 256 мың тонна, бұл елдiң жылдық қажеттiлiгiнiң жартысы (500-550 мың тонна).
"Бүгінде қоймалардағы қант пен шикі құрақ қоры – 136 мың тонна. 2024 жылдың 31 тамызына дейін квотамен ресейлік қанттың 120 мың тонна көлеміндегі импортын қосқанда, бұл шамамен 256 мың тоннаға дейін жетеді. Сонымен қатар Қазақстанда 2024 жылдың соңына дейін өңдеуге арналған 300 мың тонна шикі құрақты бажсыз әкелуге квота бар. Орта есеппен айлық тұтыну жазда 46 мың тонна, сұраныс 60 мың тоннаға жетеді. Қолданыстағы қант қоры жаңа өнімге дейін қантқа деген сұранысты өтеуге жеткілікті", – деді ауыл шаруашылығы вице-министрі Ербол Тасжүреков.
Жуырда қазақстандық тарап ресейлік әріптестерімен қант жеткізу квотасын жыл соңына дейін тағы да 100 мың тоннаға ұлғайту бойынша келіссөздер жүргізуді жоспарлап отыр.
Сонымен қатар қазақстандықтарды қантпен үздіксіз қамтамасыз ету үшін ведомствоаралық комиссиямен 2024 жылғы 31 тамызға дейін Қазақстаннан үшінші елдерге, оның ішінде халықаралық транзитті қоспағанда, ЕАЭО-ға қатысушы елдерге қант экспортына уақытша тыйым салуды енгізу туралы ұжымдық шешім қабылданды.
Бұған дейін Қазақстанда танымал қант алмастырғыш пен тағы 18 тағамдық қоспаны қолдануға тыйым салынды.