Мәслихат депутаты шаруа қожалығына бөлінген 457 миллион теңге субсидияны ұрлаған
Ақтөбе облысында аудандық мәслихат депутаты Асылбек Нұргелдин шаруа қожалықтарына субсидия ретінде берілген 457 миллион теңгені ұрлаған. Бұл туралы Stan.kz ақпарат агенттігі хабарлайды.
Асылбек Нұргелдин сол жақта
2020 жылы Асылбек Нұргелдин "К" шаруа қожалығының басшысы бола тұра, аграрлық несие корпорациясына "Г" жауапкершілігі шектеулі серіктестігінен 1200 бас ірі қара малын сатып алу келісімшартын жасап, 780 миллион теңге несие алмақ болған. Шын мәнінде оның мал сатып алу ниеті болмаған
Кепілге ірі қара малды қоямын деген, ал іс жүзінде ол мал жоқ. Депутатқа 390 миллион теңге беріліпті. Ол қаржыны туысының шаруа қожалығының есепшотына аударған. Осылайша 290 миллион теңге жеке шотқа, ал қалғаны "К" шотына аударылды.
Фото: Stan.kz
Депутаттың 2021-2022 жылдар аралығында малы болмаған. Оған қоса облыстық ауыл шаруашылығы басқармасын жаңылыстырып, ауыл шаруашылығы малдарының асыл тұқымды малын бордақылау құнын төмендетуге субсидия алуға жалған өтінім берген.
"Ол аударылған қаражатты қолма-қол ақшаға айналдырып, өз қажетіне жұмсаған, сөйтіп ауыл шаруашылығы бөліміне материалдық шығын келтірген", – деді сот.
Асылбек Нұргелдинге сот үкімі шықты. Ол қылмыстық кодекстің 190-бабы “Алаяқтық” бойынша 10 жылға коммерциялық ұйымдарда ұйымдастыру, әкімшілік және материалдық-жауапты функцияларды атқару құқығынан айыра отырып, 6 жыл бас бостандығынан айырылды.